“Avropada insan qalmaya bilər“ - İlon Mask
Qaynarinfo xəbər verir ki, onun fikrincə, hazırkı doğum səviyyəsi dəyişməsə, qitədə insan qalmaya bilər.
"Əgər doğum səviyyəsi heç olmasa əhalinin təbii artım səviyyəsinə qayıtmasa, Avropa yox olacaq", deyə Mask yazıb.
Milyarder sözlərinə sübut olaraq Şotlandiyadakı statistikanı göstərib. O bildirib ki, ölkədə ölümlərin sayı doğumları 34 faiz üstələyib. Belə ki, 2025-ci ilin yanvar-iyul aylarında 26,3 min uşaq dünyaya gəldiyi halda, 35,2 min insan həyatını itirib. Mask bu vəziyyəti "demoqrafik kollaps" adlandırıb.
Bundan əvvəl "Financial Times" yazmışdı ki, Avropa İttifaqının 12 ölkəsində Ukraynadakı münaqişə səbəbindən doğum göstəriciləri həddindən artıq aşağı səviyyəyə düşüb. Nəşrin məlumatına görə, bu problem xüsusilə Almaniyada müşahidə olunur. Estoniya, Avstriya, İspaniya, Yunanıstan və İtaliyada da göstəricilər müəyyən edilmiş həddən aşağı enib. FT vurğulayıb ki, avropalılar inflyasiya, işini itirmək qorxusu və Rusiya-Ukrayna münaqişəsi ilə bağlı narahatlıq üzündən uşaq dünyaya gətirməkdən imtina edirlər.
