Almaniyada 15 milyonluq layihə iddiası: Keçmiş "Azəravtoyol" rəhbərinin xaricdəki sərvəti hardandır?
Araşdırmaçı jurnalist Cavanşir Həsənlinin sosial şəbəkə hesabında paylaşdığı növbəti məlumat Azərbaycanda keçmiş yüksək vəzifəli şəxslərin xaricdəki əmlakları ilə bağlı sualları yenidən gündəmə gətirib.İddiaya görə, Azərbaycan Avtomobil Yolları Dövlət Agentliyinin (AAYDA) keçmiş sədri Saleh Məmmədov Almaniyada şəriklik əsasında 47 mənzilli iki yaşayış binasının tikintisini həyata keçirir.GUNDEMINFO-nun faktum.az-a istinad məlumatına görə, bildirilir ki, layihənin investisiya dəyəri təxminən 13–15 milyon avro təşkil edir və rəsmi tikinti planına əsasən obyektlərin 2027-ci ilin yayında və ya sonlarında istifadəyə verilməsi nəzərdə tutulur. Bu iddialar Cavanşir Həsənlinin paylaşımında yer alıb.Əgər bu məlumatlar doğrudursa, ortaya son dərəcə ciddi suallar çıxır.
Saleh Məmmədov uzun illər dövlət büdcəsinin milyardlarla manat vəsaitinin xərcləndiyi yol tikintisi sektoruna rəhbərlik edib. Dövlət qulluqçusunun və ya keçmiş dövlət qurumu rəhbərinin xaricdə milyonlarla avroluq daşınmaz əmlak layihəsinə ortaq olması ictimai maraq doğuran məsələdir. Belə hallarda əsas sual şəxsin sərvətə malik olması deyil, həmin sərvətin qanuni mənşəyinin necə formalaşmasıdır. 13–15 milyon avroluq investisiya adi məbləğ deyil. Belə bir layihənin maliyyə mənbəyi bank krediti, şəxsi biznes gəlirləri, investor vəsaiti və ya başqa qanuni mənbələr hesabına formalaşıbsa, bunun izahı və sənədləri mövcud olmalıdır. Əks halda, cəmiyyətdə yaranan şübhələrin aradan qaldırılması çətinləşir.
Bu hadisə həm də gəlirlərin və əmlakın şəffaf bəyan edilməsi məsələsini yenidən aktuallaşdırır. Dövlət vəzifəsində çalışmış şəxslərin sonradan xaricdə iri investisiya layihələrində görünməsi cəmiyyətin haqlı olaraq “bu vəsait haradan əldə olunub?” sualını verməsinə səbəb olur.
Məsələyə münasibət bildirmək üçün Saleh Məmmədovun və ya onun nümayəndələrinin açıqlaması da mühüm əhəmiyyət daşıyır. Onların mövqeyi dərc olunacağı təqdirdə balans prinsipi baxımından ictimaiyyətə təqdim edilməlidir.
Bu gün cavab gözləyən əsas sual isə dəyişmir: Keçmiş “Azəravtoyol” rəhbərinin Almaniyada milyonlarla avroluq yaşayış kompleksi tikəcək maliyyə imkanları hansı qanuni mənbələr hesabına formalaşıb və bu barədə aidiyyəti dövlət qurumları araşdırma aparacaqlarmı?
