Avropa Oyunlarına gələnlər üçün Bakıda xüsusi sərgi açılıb
İyunun 10-da Mədəniyyət və Turizm Nazirliyinin və “Qalereya 1969” qalereyasının təşkilatçılığı ilə I Avropa Oyunlarına həsr olunan görkəmli Azərbaycan rəssamlarının əsərlərindən ibarət “Zamanın rəngləri” adlı sərgi açılıb
Sərginin keçirilməsində əsas məqsəd I Avropa Oyunları zamanı Bakıya gələcək turistləri və ölkə vətəndaşlarını qalereyanın fondunda saxlanılan qiymətli əsərlərlə tanış etməkdir.
Modern.az saytı xəbər verir ki, “Zamanın rəngləri” adlı sərgidə görkəmli Azərbaycan rəssamlarının kolleksiyasına aid olan əsərləri təqdim olunur. Onların sırasında Mikayıl Abdullayev, Toğrul Nərimanbəyov, Böyükağa Mirzəzadə, Maral Rəhmanzadə, Abdulxalıq, Vəcihə Səmədova, Mahmud Tağıyev, Oqtay Sadıqzadə, Mirismayıl Cəfərov, Cabbar Qasımov və başqa tanınmış rəssamların əsərləri sərgilənir. Sərgidə nümayiş olunan əsərlərdə Azərbaycan tarixi və memarlığı xüsusi olaraq öz əksini tapıb.
Sərgi Avropa Oyunları bitənə qədər davam edəcək.
