Azərbaycandan İsrailə 8 ədəd xüsusi cihaz göndərilib – Qiyməti 5 milyon dollardır
Yeniavaz.com açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə İsrailə ixracın həcmi dəyər ifadəsində 52 dəfə, idxal isə 37% azalıb.
Qeyd edək ki, ixracın bu cür kəskin azalmasının səbəbi Azərbaycanın İsrailə xam neft satışını dayandırması olub. Ötən ildən fərqli olaraq bu il Azərbaycan İsrailə xam neft satmayıb.
Onu da bildirək ki, ötən ilin ilk iki ayında Azərbaycan xam neftdən başqa İsrailə 4,3 milyon dollar dəyərində 22,3 min ton metil spirti satıb. Bu ilin ilk iki ayında isə İsrailə 3,36 milyon dollar dəyərində 10,3 min ton metil spirti, 1,46 milyon dollar dəyərində 2,1 min ton makaron ixrac edilib.
Bunlardan başqa Azərbaycandan İsrailə ümumi dəyəri 5 milyon dollar olan 8 ədəd xüsusi cihaz (Gömrük kodu 847141 – Bir korpusda prosessor və giriş-çıxış qurğusu olan hesablama maşınları) göndərilib. Açıqlanan məlumatlardan da göründüyü kimi Azərbaycandan İsrailə ixrac olunan bir ədəd cihazın, ya da xüsusi kompyuterin orta gömrük dəyəri 625 000 dollar (1 milyon 62,5 min manat) olub.
