Dünyanın ən bürokratik ölkələri açıqlandı – Siyahıda Türkiyə də var
Beynəlxalq araşdırmalar dünyanın müxtəlif ölkələrində bürokratiyanın səviyyəsini ortaya qoyub.Yeniavaz.com xəbər verir ki, qiymətləndirmələr biznes fəaliyyətinin aparılması, vergi öhdəliklərinin yerinə yetirilməsi, dövlət xidmətlərinə çıxış və inzibati prosedurların mürəkkəbliyi kimi meyarlar əsasında aparılıb.
Biznes və maliyyə bürokratiyası üzrə “TMF Group”un Qlobal Biznes Çətinlik İndeksində 78 yurisdiksiya 292 göstərici üzrə qiymətləndirilib. Hesabatda qanunvericilik tələbləri, vergi uyğunluğu, inzibati prosedurlar və biznes mühitinin mürəkkəbliyi nəzərə alınıb.
Araşdırmaya əsasən, biznes aparmaq baxımından ən bürokratik ölkələr bunlardır:
Braziliya
Fransa
Peru
Meksika
Kolumbiya
Yunanıstan
Türkiyə
İtaliya
Boliviya
Polşa
Hesabatda qeyd olunur ki, xüsusilə Braziliya və Fransada şirkətlər mürəkkəb vergi sistemi, əmək qanunvericiliyi və çoxpilləli inzibati prosedurlar səbəbindən ciddi çətinliklərlə üzləşirlər.
Eyni indeksə görə, biznes üçün ən əlverişli və ən az bürokratik ölkələr isə Kayman Adaları, Danimarka, Honq Konq, Britaniya Virgin Adaları, Cersi, ABŞ, Yeni Zelandiya, Norveç və Böyük Britaniyadır.
Digər tərəfdən, “InterNations Expat Insider”ın araşdırması vətəndaşlar və əcnəbilər üçün dövlət xidmətlərinə çıxışın, viza alınmasının, bank hesabı açılmasının və rəqəmsal xidmətlərdən istifadənin asanlığını qiymətləndirib.
Bu reytinqdə ən az bürokratik ölkələr sırasında Sinqapur, Lüksemburq, Birləşmiş Ərəb Əmirlikləri, Avstraliya və Hollandiya yer alıb. Hesabatda bu ölkələrdə dövlət xidmətlərinin yüksək rəqəmsallaşdırıldığı və inzibati prosedurların sürətli olduğu vurğulanır.
Araşdırmada Almaniya da diqqət çəkən ölkələrdən biri kimi göstərilib. Bildirilir ki, güclü iqtisadiyyatına baxmayaraq, kağız sənədlərdən geniş istifadə, proseslərin ləngliyi və rəqəmsal infrastrukturun kifayət qədər inkişaf etməməsi səbəbindən Almaniya tez-tez ən bürokratik ölkələr arasında qiymətləndirilir.
Bundan əlavə, İtaliya və Malta da uzun inzibati prosedurlar və bələdiyyə xidmətlərinin ləng göstərilməsi ilə seçilən Avropa ölkələri sırasında göstərilib.
