DYP: Yolların hərəkət hissəsində qar və bəzi yerlərdə buzlaşma var - VIDEO
Hazırda Baki-Quba-Rusiya sərhədi yolunun 85-ci km-dən başlayaraq avtomobil yollarının bir hissəsinə qar yağır. Lakin nəqliyyat vasitələrinin hərəkəti dayanmayıb.
Bu barədə Oxu.Az-a Daxili İşlər Nazirliyinin (DİN) Baş Dövlət Yol Polisi İdarəsindən (DYP) məlumat verilib.
Məlumatda qeyd olunub ki, Gəndob-Yalama yolunda, Bakı-Şamaxı-Yevlax yolunun 48-ci km-dən başlayaraq, həmçinin Ağsu aşırımında qar yağır, yolların hərəkət hissəsində qar və bəzi yerlərdə buzlaşma var. Bakı-Qazax-Gürcüstan sərhədi yolunun 400-cü km-dən başlayaraq qar yağır, avtomobillərin hərəkəti davam edir.
Belə ki, qeyd olunan istiqamətlərdə hər iki oxu aparıcı olan, qış şinləri ilə təchiz olunmuş nəqliyyat vasitələrindən istifadə edilməsi, eyni zamanda qarlı hava şəraitində və buzlu yollarda avtomobili idarə etmək bacarığı olmayanların yola çıxmaması xahiş olunur.
Dövlət Yol Polisi əməkdaşları yollarda sürücülərə köməklik göstərir.
