“Bosniya qəssabı” Ratko Mladiç öldü
Bosniya və Herseqovina serblərinin keçmiş ordu komandanı “Bosniya qəssabı” Ratko Mladiç ölüb.Yeniavaz.com xəbər verir ki, bu barədə “Informer” telekanalı məlumat verib.
Məlumata görə, müharibə cinayətkarı BMT-nin Haaqadakı həbsxanasında 85 yaşında ölüb.
Telekanalın məlumatına görə, Mladiç son vaxtlar ağır xəstə olub.
Telekanal əlavə məlumat verməyib.
Qeyd edək ki, 16 il gizlənən Ratko Mladiçin yeri 2011-ci ildə aşkarlanıb. O, Haaqaya ekstradisiya edilib və 2017-ci ildə keçmiş Yuqoslaviya üzrə Beynəlxalq Cinayət Tribunal tərəfindən soyqırımı, müharibə cinayətləri və bəşəriyyətə qarşı cinayətlərə görə ömürlük həbs cəzasına məhkum olunub.
O, 1992-1995-ci illərdə Bosniya və Herseqovinada baş verən müharibə zamanı Bosniya serblərinin ordusuna rəhbərlik edib. 1995-ci il iyulun 11-də serb qüvvələrinin Bosniya və Herseqovinanın şərqində yerləşən Srebrenitsaya daxil olmasından sonra şəhərdə və ətraf ərazilərdə bosniyalı müsəlmanlara qarşı kütləvi qətllər törədilib. Bir neçə gün ərzində 8 372 bosniyalı mülki şəxs öldürülüb, onların cəsədləri müxtəlif kütləvi məzarlıqlarda basdırılıb.
2007-ci ildə Keçmiş Yuqoslaviya üzrə Beynəlxalq Cinayət Tribunalı Srebrenitsa və ətrafında baş verənləri soyqırımı kimi tanıyıb.
