"Kəpəz" MTK binanın damını söküb mərtəbə artırır" - Yasamaldan şikayət
"Kəpəz" MTK ilə bağlı redaksiyamıza şikayət daxil olub.
Oxu.Az xəbər verir ki, şikayət MTK-nın inşa etdiyi binanın damında apardığı söküntü işləri ilə bağlıdır.
Söhbət Bakı şəhəri, Yasamal rayonu, Mirzə Fətəli Axundov küçəsi, 175-177 ünvanında yerləşən binadan gedir. Vətəndaş qeyd edir ki, əlavə mərtəbə tikmək məqsədilə binanın damında söküntü işləri aparılır.
Daha sonra sakin sözlərinə belə davam edir:
"Şəhərin mərkəzində insanların həyatını təhlükəyə ataraq binada əlavə bir mərtəbə tikmək tam qanunsuzluqdur. Binaların damları yaşayış üçün nəzərdə tutulmayıb. Lakin MTK rəhbərliyi yaşayış məqsədli mənzil düzəltmək üçün binaların damlarını tamamilə sökür. Gələcəkdə bu evləri alan vətəndaşlar çox böyük riskə girəcəklər. Məsələ ilə bağlı aidiyyəti qurumlara müraciət ünvanlansa da, tədbir görülmür".
Qeyd edək ki, məsələ ilə bağlı aidiyyəti qurumlara sorğu ünvanlanıb.
