Nazirliyin qapısını sındırandan sonra əlillik verilən qazi: "Gözümdən pərdə asdılar..."
Qazi Cebhe.info-ya açıqlamasında əlillik təyinatı ilə bağlı nazirliyin onu get-gələ saldığından gileylənib:
"Nazirlik mənə qapını sındırandan sonra əlillik təyin etdi. Mənim gözümdən pərdə asdılar. Narazılıqlarım var. Hazırda nazirliyə gedirəm, sənəd istəyiblər. Əlillik verilməyinə baxmayaraq, hələ də məni süründürürlər. Kartım verilməyib, bununla bağlı mənə deyilir ki, ora get, bura get".
Vaxtilə Hövsanda təkərlərin arasında yatan qazi hazırda kirayə qaldığını bildirib:
"Təkərlərin arasında yatırdım. Qazi yoldaşlarım sayəsində kirayəyə çıxdım. Aylıqlarını alanda kirayə pulumu ödəməyim üçün hərəsi 20-30 manat kömək edirlər. Gənc Qazilər İctimai Birliyinin sədri Hacı Vəliyev bizim rəhbərimizdir, sağ olsun, köməkliyi dəyir. Həmin ərəfələrdə Hacı müəllim və qazilərlə məni təkərlərin arasından götürüb. Kirayə haqqımı da qazi qardaşlarım ödəyir".
Kirayə haqqının 230 manat olduğunu deyən qazi mənzil üçün kommunallarla birgə 300 manat ödədiyini bildirib. Ana-atasının rayonda yaşadıqlarını, ailəvi məsələyə görə onlarla əlaqəsiin olmadığını da qeyd edib.
Qeyd edək ki, bir müddət öncə Əmək və Əhalinin Sosial Müdafiəsi Nazirliyinin qarşısında keçirilən aksiyada iştirak edən qazi Elçin Verdiyevə sözügedən hadisədən sonra əlillik dərəcəsi təyin edilib. Həmçinin, aksiya zamanı binanın mühafizəsində iştirak edən polis qapını sındıraraq içəri daxil olan Elçin Verdiyevi qucaqlamışdı. Polisin bu jesti sosial şəbəklərdə kifayət qədər rəğbətlə qarşılanmışdı.
