Məhkəməyə verib nə edəcəkdilər?! - Nemət Pənahlıdan Elçibəy ailəsinə cavab
Meydan hərəkatının fəal iştirakçısı Nemət Pənahlının mərhum eks-prezident Əbülfəz Elçibəylə bağlı səsləndirdiyi ittiham qalmaqala səbəb olub. Nemət Pənahlı iddia edir ki, Əbülfəz Elçibəy 80-ci illərin sonlarında vüsət alan Meydan hərəkatı zamanı toplanmış 10 milyon manatı mənimsəyib. İttihamı rədd edən mərhum eks-prezidentin oğlu Ərturqut Əliyev Nemət Pənahlını məhkəməyə verəcəyini bildirib. Lakin o, sonradan fikrini dəyişib.Ərturqut Əliyev Modern.az-a açıqlamasında Nemət Pənahlını məhkəməyə verməkdən vaz keçdiyini bildirib.
"Onu məhkəməyə verməkdən vaz keçdim. Buna dəyməz. Ailəmlə məsələni müzakirə edib məsləhətləşdim. Qərara gəldik ki, belə bir addım atmağa lüzum yoxdur",- deyə o qeyd edib.
Nemət Pənahlı da məsələyə münasibət bildirib.
O, Modern.az-a deyib ki, qarşı tərəf məhkəməyə müraciət etsəydi belə, heç nə qazanmayacaqdı:
"Əbülfəz bəy prezident olanda məni məhkəməyə vermişdilər və onun acı nəticələrini görmüşdülər. İndi məni məhkəməyə verib nə edəcəkdilər ki?! Mən öz bildiyim informasiyanı deyirəm. O zaman məni guya prezidentin şərəf və ləyaqətini alçatdığıma görə məhkəməyə verdilər. Həbsdə zəhərləyib öldürmək istədilər. Ancaq özləri pis vəziyyətdə qaldılar".
