Bakıda mənzil qarət edildi: 25 min manat oğurlandı
Ötən gün Bakının Suraxanı rayonunda mənzillərin birindən 25 min manat oğurlanıb.
Bu barədə Oxu.Az-a Suraxanı rayon Polis İdarəsindən məlumat verilib.
Cinayət qurbanı Hövsan qəsəbəsi sakini, 39 yaşlı Samir Hüseynovdur. O, iyunun 12-də səhər saat 09:00-dan, axşam saat 17:00-a kimi evdə olmayıb. Zərərçəkən qarətin həmin vaxt kəsiyində törədildiyini iddia edir.
Cinayətda bir məqam diqqət çəkir. S.Hüseynov doqquz mərtəbəli yaşayış binasının üçüncü mərtəbəsində yaşayır. Cinayətkar mənzilə əsas giriş qapısından yox, eyvandan daxil olub (eyvanın qapısı açıq olub).
Şübhəlinin kimliyi hələlik müəyyən edilməyib. 30-cu Polis Bölməsinin əməkdaşları cinayətin üstünü açmağa çalışır.
Qeyd edək ki, ötən günlərdə paytaxt ərazisində 38 şəxsi mülkün oğurlanması faktı qeydə alınıb. Geridə qoyduğumuz iyun ayında isə qeydə alınmış qarətlərin sayı 390-a çatıb. Bu müddət ərzində paytaxtın əməliyyatçıları şəxsi mülkün oğurlanması ilə bağlı 66 işin üstünü açıb.
