BDU-nun 3000-dək əməkdaşına birdəfəlik pul mükafatı verilib
Bakı Dövlət Universitetinin (BDU) 3000-dək əməkdaşına birdəfəlik pul mükafatı verilib.
"Report"un xəbərinə görə, bunu universitetin Mətbuat xidmətinin rəhbəri Pərvanə İbrahimova bildirib.
Onun sözlərinə görə, BDU-nun Elmi Şurasının dekabrın 20-də keçirilən iclasında rektor vəzifəsini icra edən, professor İradə Əliyevanın təklifi əsasında 31 Dekabr Dünya Azərbaycanlılarının Həmrəyliyi Günü və Yeni il bayramı münasibətilə universitetin bütün əməkdaşlarına birdəfəlik pul mükafatının verilməsi barədə qərar qəbul edilib.
Pul mükafatı ümumilikdə 3 minədək əməkdaşa şamil edilib. Eyni zamanda, əvvəlki illərdə olduğu kimi, gələn ildə də differensasiya yolu ilə elm, tədris və ictimai fəaliyyət sahəsində fərqlənən və xüsusi nailiyyətləri olan 300-dək professor-müəllim heyətinin əmək haqqının artırılması məsələsi də müzakirə edilib.
