ABŞ-da tutulan iranlı jurnalist sərbəst buraxıldı
İranın “Press-TV” telekanalının ABŞ-da həbs edilən qadın jurnalisti Mərziyə Haşəmi sərbəst buraxılıb. Bu barədə telekanala jurnalistin ailəsindən məlumat verilib. Lakin onun azad olunmasının detalları açıqlanmayıb.
Azvision.az xatırladır ki, iranlı jurnalist Mərziyə Haşəmi ötən həftə ABŞ-ın Missuri ştatının Sent-Luis şəhərində həbs olunmuşdu. Haşəmi ABŞ-dakı afro-amerikalıların (qaradərili vətəndaşların) polis qəddarlığı və özbaşınalığından müdafiəsi üzrə ictimai hərəkat barəsində sənədli filmin çəkilişlərində iştirak etmək üçün Missuriyə getmişdi. Lakin ABŞ polisi onu həbs etmişdi. Buna əsas kimi iranlı jurnalistin vacib informasiyaya sahib olduğu və bu səbəbdən sadəcə şahid kimi saxlanıldığı bildirilmişdi.
18 yanvarda Kolumbiya dairə məhkəməsinin yaydığı sənəddə qeyd edilmişdi ki, andlılar məhkəməsi qarşısında ifadə verdikdən sonra Haşəmi sərbəst buraxılacaq.
