Daha bir ölkə koronavirusa qalib gəldiyini elan etdi
Yeni Zelandiya sərhədlərin bağlanması istisna olmaqla, koronavirusla bağlı tətbiq edilən bütün məhdudiyyətləri ləğv edib.
Virtualaz.org bildirir ki, bunu ölkənin Baş naziri Casinda Ardern deyib.
Onun sözlərinə görə, ictimai və özəl tədbirlər məhdudiyyətsiz keçirilə, pərakəndə ticarət və otel sektoru normal fəaliyyət göstərə, eləcə də bütün ictimai nəqliyyatın işi bərpa oluna bilər.
Ölkə Səhiyyə Nazirliyinin bu gün yaydığı məlumata görə, son iki həftə ərzində ölkədə koronavirusa yoluxan qeydə alınmayıb. Oklendə həkimlərin nəzarəti altında olan koronavirusa yoluxmuş sonuncu xəstə isə tamamilə sağalmış elan edilib. Yeni Zelandiyanın baş sanitar həkimi bildirib ki, hazırda ölkə ərazisində həmin diaqnozun təsdiq olunduğu insan qalmayıb.
Qeyd edək ki, Yeni Zelandiyada ümumilikdə 1504 nəfər koronavirusa yoluxub. Onlardan 1402 nəfər sağalıb, 22 nəfər isə həyatını itirib. Sonuncu yoluxma halı mayın 22-də qeydə alınıb. Ölkə üzrə 295 min nəfər koronavirus testindən keçirilib.
