Gürcüstana bu il 1,4 milyondan çox Azərbaycan vətəndaşı səfər edib
Bu ilin yanvar-noyabr ayları ərzində 1 404 028 Azərbaycan vətəndaşı Gürcüstana səfər edib.
APA-nın yerli bürosu xəbər verir ki, bu barədə Gürcüstan Milli Turizm Agentliyinin hesabatında məlumat verilib.
Bildirilib ki, bu göstərici əvvəlki ilin hesabat dövrü ilə müqayisədə 92 121 nəfər və ya 7% artıb.
Təkcə cari ilin noyabrında isə Gürcüstana 114 657 Azərbaycan vətəndaşı səfər edib ki, bu göstərici ötən ilin eyni dövrü ilə müqayisədə 8 552 nəfər və ya 8,1% artıb.
Azərbaycan həm cari ilin 11 ayı ərzində, həm də təkcə noyabr ayına olan göstəriciyə görə bu ölkəyə ən çox səyahətçi göndərən ikinci ölkə olub.
Cari ilin yanvar-noyabr ayları ərzində Gürcüstana ümumilikdə 8 690 352 xarici ölkə vətəndaşı səyahət edib ki, bu da əvvəlki ilin hesabat dövrü ilə müqayisədə 584 523 nəfər və ya 7,2% çoxdur. Bütün səfərlərin yalnız 66%-i və ya 4 768 432-si turizm məqsədi ilə edilib. Turist kimi Gürcüstana səfər edənlərin sayı əvvəlki illə müqayisədə 281 837 nəfər və ya 6,3% artıb.
