Gürcüstan vətəndaşlarından başqa heç bir əcnəbi turist qatarla Azərbaycana gəlməyib
Bu ilin avqust ayında Azərbaycana turizm məqsədilə 175 min 507 nəfər əcnəbi gəlib.Yeniavaz.com açıqlanan rəsmi məlumatlara istinadən xəbər verir ki, bu göstərici ötən ilin eyni dövrü ilə müqayisədə 1,8% və ya 3 min 169 nəfər azalıb.
Qeyd edək ki, avqust ayında Azərbaycana gələn turistlərin cəmi 0,4%-i və ya 695 nəfəri ölkəyə quru yolla daxil olub.
Ölkəyə quru yolla daxil olanların hamısı Gürcüstan vətəndaşları olub. Bu isə o deməkdir ki, avqust ayında orta hesabla hər gün 22 nəfər Gürcüstan vətəndaşı quru yolla Azərbaycana gəlib. Avqust ayında təyyarə ilə Azərbaycana gələn Gürcüstan vətəndaşlarının sayı 3 min 555 nəfər olub.
Məlumat üçün bildirək ki, 6 illik fasilədən sonra bu ilin 26 may tarixindən etibarən Bakı-Tbilisi-Bakı sərnişin qatarı fəaliyyətə başlayıb.
Onu da qeyd edək ki, Bakı-Tbilisi-Bakı sərnişin qatarı fəaliyyətə başladıqdan sonra Gürcüstan vətəndaşlarından başqa heç bir əcnəbi turist bu qatarla Azərbaycana gəlməyib. İyun ayında Tbilisi-Bakı qatarı ilə 316 nəfər, iyul ayında isə 415 nəfər Gürcüstan vətəndaşı turist kimi Azərbaycana gəlib.
