Yanacaqdoldurma məntəqəsinə saxta pul verib qaçan şəxs tutuldu
İsmayıllı rayonunda yanacaqdoldurma məntəqəsinə saxta əskinas verən şəxs tutulub.
Musavat.com Daxili İşlər Nazirliyinin (DİN) saytına istinadən bildirir ki, bu il martın 20-də İsmayıllı rayonunda yerləşən yanacaqdoldurma məntəqələrindən birində operator işləyən şəhər sakini Asif Mirzəzadə Rayon Polis Şöbəsinə (RPŞ) müraciət edərək martın 18-də “VAZ-21015” markalı avtomobilin naməlum sərnişininin saxta 50 manatlıq əskinas verərək 10 manatlıq yanacaq doldurduğunu və ona 40 manat pul qaytardığını bildirib.
İsmayıllı RPŞ əməkdaşlarının keçirdikləri əməliyyat-axtarış tədbirləri nəticəsində hadisəni törətmiş rayon sakini, əvvəllər məhkum olunmuş Asim Süleymanov tutulub.
Ətrafında aparılmış əməliyyat tədbirləri ilə onun martın 19-da rayon sakini R.Nuriyevə məxsus “VAZ-21011” markalı avtomobili qaçırdığı da müəyyən edilib.
