Elçin Şıxlı yeni açdığı internet televiziyasından danışdı
Məlum olduğu kimi, tanınmış media eksperti Elçin Şıxlının rəhbəri olduğu Ayna.az saytının nəzdində Ayna TV internet televiziyası fəaliyyətə başlayıb.
Məlum yeniliklə bağlı Moderator.az-a açıqlama verən E.Şıxlı bu yeniliyi doğuran səbəblərə aydınlıq gətirib:
“Öncə onu deyim ki, bu, sözün tam mənasında televiziya deyil. Biz 4-5 müəllif yazdığımız yazıları müzakirəyə çıxardırıq. Tutaq ki, hansısa fikirlə yazdığım bir yazını həmkarlarımla müzakirəyə çıxardıram və bununla bağlı onların da fikirlərini öyrənirəm. Bu, həftədə bir dəfə yarım saat civarında olan bir söhbətdir. Buna debat demək istəmirəm. Çünki bu, daha çox intellektual söhbətdir.
Belə bir yeniliyin tətbiqi müəyyən zərurətdən irəli gəldi. Hiss elədik ki, belə bir yeniliyə ehtiyac var. Interaktivlik üçün insanlar görüntülərə çox üstünlük verir. Ona görə də belə bir addım atma qərarına gəldik”.
