"İsa Qəmbərlə görüşüm təsadüfən olub" — Türkiyə parlamentinin sabiq sədri
Türkiyə Böyük Millət Məclisinin (TBMM) sabiq sədri, Baş nazirin keçmiş müavini Cəmil Çiçək hazırda Türkiyənin Hacettepe xəstəxanasında müalicə olunan Milli Strateji Düşüncə Mərkəzinin sədri, sabiq spiker İsa Qəmbərlə görüşündən danışıb. Cəmil Çiçək “Ölkə.Az”-a açıqlamasında görüşünün təsadüfən baş tutduğunu söyləyib:
“Həmin xəstəxanada yatan dostlarım var. Onları ziyarət etməyə getmişdim. Keçmiş millət vəkillərindən biri mənə zəng edib bildirdi ki, İsa Qəmbər də həmin xəstəxanada yatır. Mən də gedib onu bir dəqiqəliyinə də olsa ziyarət etdim. Mənim onu ziyarət etməyim insani məqsəd daşıyır. Buna siyasi şərh verilməsi doğru deyil”.
Cəmil Çiçək hazırda İsa Qəmbərin səhhətinin yaxşı olduğunu söyləyib:
“İsa Qəmbərə baş çəkdiyim zaman xəstəxana rəsmilər ilə də söhbət etdim. Onlar bildirdilər ki, İsa Qəmbərin səhhəti günü-gündən yaxşılaşır. İsa Qəmbərin səhhəti ilə universitet rektoru maraqlanır. Mən də onu yaxşı gördüm”.
