Konstitusiya Məhkəməsi dairələrin nəticəsini ləğv edə bilər
Ötən gün Mərkəzi Seçki Komissiyası (MSK) fevralın 9-da Milli Məclisə keçirilən seçkilərə yekun vurub və seçkilərin ümumi yekunlarına dair protokolu tərtib edib. Protokol tərtib edildikdən sonra MSK üzvləri tərəfindən imzalanıb. Daha sonra seçkilərin ümumi yekunlarına dair protokolun təsdiq edilməsi üçün əlavə edilmiş sənədlərlə birgə Konstitusiya Məhkəməsinə təqdim edilməsi barədə qərar qəbul edilib.
Bəs maraqlıdır, Konstitusiya Məhkəməsinin özünün araşdırma apararaq hansısa seçki dairəsinin nəticəsini ləğv etmək səlahiyyəti varmı?
Məsələ ilə bağlı Modern.az-a danışan Azərbaycan Vətəndaş Cəmiyyətinin İnkişafına Yardım Assosiasiyasının Seçki Qərargahının rəhbəri Məhərrəm Zülfüqarlı Konstitusiya Məhkəməsinin seçkinin nəticələri ilə bağlı araşdırma edə biləcəyini deyir:
“MSK seçkinin nəticələrini Konstitusiya Məhkəməsinə verdikdən sonra məhkəmə özü də araşdırma edir. Bu araşdırma zamanı hər hansısa dairənin nəticələri ləğv edilə bilər. Bu, mümkündür”.
